[1]Suche Sortierung nach [2]Monatsdigest
   [3][prev.png] 2001/12/28 12:18:48
   Doris Baumert
   Fw: [SCI] Generalkommission fuer Schlesien zu Breslau [4]Datum
   2001/12/28 12:59:23
   Thaufelder & Tzschoppe
   Re: [SCI] Lied "Streuselkuchen" [5][next.png]
   [6][prev.png] 2001/12/05 03:45:46
   Guenter Boehm
   [SCI] "Boehmen" in Polnisch? [7]Betreff 2001/12/28 07:12:54
   geierbande1(a)compuserve.de
   [SCI] "Moh-Kliessla" [8][next.png]
   [9][prev.png] 2001/12/02 23:50:12
   Winfried Schoen
   [SCI] Ahnenprogramm, Dank [10]Autor 2001/12/28 13:55:47
   Winfried Schoen
   [SCI] Kreis Liegnitz [11][next.png]
     __________________________________________________________________

  [SCI] "Die Nachwirkungen der Feiertage"

   Date: 2001/12/28 12:53:02
   From: Winfried Schoen <wima.schoen(a)...
Hallo Freunde!
Ich hoffe, es ist keinem so ergangen wie in diesem Gedicht!?
Gruss Winfried

Gesunde Feiertage!

Die Feiertage fanga oan,
Wie fraen siech doo Weib, Kind und Moan.
Jitz koan ma doch uff Ruhe huffa,
"Gesunde Feiertage" ruffa
Sich olle Nupperschleute zu ,
und olle sein se ehrlich fruh,
Der Herr, die Froo und is Gesinde,
Doss endlich uufhiert doas Geschinde.

Ma zieht sich oan, ma macht sich schien,
Ma werd amoll zum Nupper giehn,
Ma zeigt sich, wenn eem war besucht,
Woas eem is Christkind hoot gebrucht.
Ma guckt amoll zum Fanster naus,
und kloppt is Tobackfeifla aus,
Ma sitzt om Uwa huebsch gemuetlich,
Und tutt sich onn derr Waerme gietlich,
Und denkt, wie labt sichs jitz doch fein,
Bluss gutt, doss Feiertage sein.

Nu wiel natierlich oo derr Maga,
Woas merka voo a Feiertaga.
Drim werd'm tichtig eigegan:
Fleesch, Kliessla, Tunke Marzepan,
Moostriezel, Fafferkucha, Nuesse,
Uffs saure Zeug kimmt glei is Sisse,
Uffs Sisse wieder saures glei,
Is hoot ju Plotz, is gieht ju nei,
Leit hier nich noch awing Schuckloade?
Ock immer har! - Uem die waersch schoade.

Nich immer werd eem doas gebota,
Merr hotta zwoar errscht Gaensebroata,
Doch kinn merr, weil merrsch groade hoan,
Awing Schuckloade noch vertroan,
A Striezel wulln merr oo nich missa,
Zwee Aeppel warn noch oangebissa,
Nu brengt die Mutter uff a Tiesch,
`n huebscha fetta Roocherfiesch,
Und weils noch groade eene hotte,
Ass mer noch flink`n Kieler Sprotte,
`n sissa Faffermoan derzu,
Nu ies derr Maga endlich fruh.
Nu hiern merr endlich uuf zu kaun,
Derr Maga ruht und koan verdaun.

A koan verdaun, a wiel ock nich.
A drickt und wurgt goar jaemmerlich.
Schwer wie a Muehlsteen leit a drinne,
Eim runda Baeuchla, - oo pfui Spinne.
Nu flink is Bolsomflaschla har,
Glei ies doas ganze Flaschla lar.
Jitz noch`n Asperin-Tablette
Nee ies mir schlecht, - iech muuss eis Bette.
Nee kumm ock hurtig, liebstes Weib,
Mach merr`n Uemschlag uem a Leib.

Nee nee, asu miech vulzustuppa,
Breng merr ock schnell die Hoffmonnstruppa.
Hoots nich oo noch ang Baldrian?
Du konnst merr glei zwee Loeffel gan.
Och jeckersch nee, och jeckersch nee,
Weib, koch merr ock`n Fliedertee.
A Tassla Tausendguldenkraut,
Iech krieg ju schunt`n Gaensehaut.
Mei Schadel ies schunt ganz benumma,
Hier muuss wull doch derr Dukter kumma.

Derr Dukter, dar ies glei zur Stelle,
A lauert ju uff sichte Faelle.
A weess schunt, - onn a Feiertaga,
Verderbt sich moncher Mensch senn Maga.
Und sein die Leute sust nich krank,
Jitz sein se`s wieder, - Goot sei Dank!
Rizinusoel werd a verschreiba,
Doas werd die Krankheet schnell vertreiba,
Ma muuss zwoar ueftersch amoll naus,
Hauptsache, doss se und kimmt raus,
Und ma verliert doas Magadruecka,
Die Rechnung werd a spaeter schicka.
Nu gibbts a faerchterlich Gewinsel,
A gruss Gejommre und Geklinsel,
Ma laet sich quar, ma laet sich krumm,
Och Tud erborm diech doch und kumm!

Asu a Maga zu verterba,
Jech war wull hinte Nacht noch sterba,
Ma kruemmt sich wie a Roadfoahrschlauch,
Och je mei Bauch, och je mei Bauch!
Na jommert mit gebrochner Stimme:
"Schuckloade ass iech keene nimme,
Iech wiel oo goar kee Marzepan,
Und keene Wellwurscht nimme sahn,
Iech maag oo goar kenn Roocherharig,
Nee, bluss noch Weissquork assa war iech,
Iech wiel kenn Speck, kenn Schinka meh,
Nee nee, nee nee.
Iech asse ueberhaupt nischt meh."

Und wieder muuss ma wie derr Blitz,
Naus uff dan stilla, runda Sitz,
Die holbe Nacht gieht doas Geloofe,
Ma kimmt zu kemm gesunda Schlofe.
Jitz endlich ies derr Maga reen,
A drueckt eem nimme wie a Steen,
Die Lompe brennt eim Stuebla helle,
Nu, Mutter, breng ock`n Sardelle!
Die treibt a Koater naemlich weg.
Woas andersch haette jitz kenn Zweck.

Nu war iech noch a bissla ruhn,
Iech hoa ju Zeit und nischt zu tun.
A schmesst sich nimm ei senner Orche
Und schunt faengt oan a gruss Geschnorche.
Om andern Murga muuss ma raus,
Die Feiertage, die sein aus.
Verpucht, zieht ma is Maul doo schief,
Weil ma noch gerne wetter schlief.
Zum Punkte ies natuerlich oo
Die grusse Dukterrechnung doo.
Zahn Mark sein reif, doo hilft kee Jommern.
Kee Heuln und Onn-a-Geldsaak-klommern,
War nicht bezoahlt, dar werd gepfaendt,
Und wenn a grusse Truppa flennt.
Doo ies ma nuechtern mit emm Schlage,
Und denkt: na, doas worn Feiertage!
(Ernst Schenke)

References

   1. https://list.genealogy.net/mm/archiv/schlesien-l/suche.html
   2. https://list.genealogy.net/mm/archiv/schlesien-l/2001-12/2001-12f.html
   3. https://list.genealogy.net/mm/archiv/schlesien-l/2001-12/msg00585.html
   4. https://list.genealogy.net/mm/archiv/schlesien-l/2001-12/dindex.html#00586
   5. https://list.genealogy.net/mm/archiv/schlesien-l/2001-12/msg00587.html
   6. https://list.genealogy.net/mm/archiv/schlesien-l/2001-12/msg00080.html
   7. https://list.genealogy.net/mm/archiv/schlesien-l/2001-12/bindex.html#00586
   8. https://list.genealogy.net/mm/archiv/schlesien-l/2001-12/msg00580.html
   9. https://list.genealogy.net/mm/archiv/schlesien-l/2001-12/msg00042.html
  10. https://list.genealogy.net/mm/archiv/schlesien-l/2001-12/aindex.html#00586
  11. https://list.genealogy.net/mm/archiv/schlesien-l/2001-12/msg00590.html